| Xoves 29 de agosto. 2019
| Ás 19:00 h.
| Praza Arquitecto Antonio Palacios » ver mapa
> En caso de choiva trasladarase ao Centro Cultural Municipal
Un espectáculo da Cía Teatro Ghazafelhos
“A illa sen tesouro” é unha proposta de teatro de rúa da compañía Ghazafelhos. Apoiados nunha escenografía dinámica que se transforma nun mesón, nun barco, unha cova e nunha empalizada, os tres actores e actriz reinterpretarán os distintos momentos, coa participación do público, da fabulosa aventura de piratas. Música, bailes, pelexas de espadas, toda a acción que se espera deste xénero mesturada co humor inconfundible do teatro dos Ghazafelhos e unha chiscadela a un clásico literario para toda a familia.
Teatro Ghazafelhos é unha compañía nacida en Narón no ano 2006 especializada en teatro de actor e clown. Trátase dunha das compañías galegas de referencia para público familiar. Ghazafelhos compóñena Montse Piñón, Pepablo Patinho e Jorge Casas. Unha compañía consolidada que nos sorprende con cada nova das súas producións, mesturando xéneros, falándonos de temas variados e levándonos a mundos cheos de maxia. No seu repertorio destacan obras como Frankenstein, Nana para un Soldado, Bon Appetit, Irinha Bailariña e un longo etcétera. Pepablo Patinho e Montse Piñón son tamén os actores protagonistas do musical de Magín Blanco A nena e o grilo nun barquiño. Nos últimos tempos destacan montaxes como Rubicundo, baseado no libro homónimo de María Canosa ou Lúa, unha tenra historia sobre as relacións humanas e o mundo dende a ollada dos nenos. O humor incomparable dos Ghazafelhos fai desta compañía unha das preferidas polas familias.
