| Sábado 7 de setembro. 2024
| Ás 20:00 h
| Praza Arquitecto Antonio Palacios » ver mapa
DoRoxo Presbiçian irrompe na escena musical galega cun torrente de adrenalina e contundencia, cativando a público e crítica por igual. Nacidos en Mos, en abril de 2021, este quinteto soubo labrar un estilo propio que bebe de diversas fontes, desde o rock clásico ata sons máis actuais, creando composicións propias con letras cargadas de existencialismo vital e reivindicativo.
A historia de DoRoxo Presbiçian comeza con Chechi, no micro, e Poli ao baixo, dous amigos unidos pola súa paixón pola música. A eles sumaríanselles Koki e, Kami, ás guitarras, e Marcos na batería, quen foi substituído por Cris, completando esta explosiva formación.
Os directos de DoRoxo Presbiçian son unha experiencia directa e fulminante. As súas melodías rápidas e directas, o seu baixo contundente e pesado, a súa batería poderosa e a voz visceral de Chechi crean unha atmosfera única que agarra ao público desde o primeiro acorde. Sen dúbida a banda bebe do grunge máis cru, unha influencia que se reflicte na intensidade das súas riffs, a paixón das súas melodías e a crueza das súas letras, creando un cóctel explosivo que os diferenza do resto.
Pero se algo caracteriza a este grupo, son as súas letras. DoRoxo Presbiçian non rehúye temas complexos como a saúde mental, o feminismo ou a inmigración, abordándoos cunha sensibilidade e unha crueza que non deixan indiferente a quen se coloca fronte a eles.
