| Luns 24 de setembro. 2018
| Ás 21:00 h.
| Praza Arquitecto Antonio Palacios » ver mapa
Xulio Lorenzo é un músico e compositor Galego nacido en Louredo, unha parroquia do Concello de Mos na provincia de Pontevedra.
Comeza o estudo da gaita no 1992 na casa do pobo(centro cultural de Louredo) da man de gaiteiros de renome no lugar como son O Señor Xosé (Dornelas) e máis tarde co Sr. Xosé Dense Cortizo, gran Mestre e sobre todo gran amigo persoal.
Os 15 anos forma parte do grupo folk Eimiñavella de Reboreda en Redondela. No 1997 pasa a ser integrante da Banda de gaitas Xarabal de Vigo, dirixida polo Mestre de Mestres, Antón Corral. En Xarabal coñece a grandes artistas e compañeiros dos cales aprende os segredos da gaita galega.
Despois de varios anos sendo autodidacta, Xulio Lorenzo decide facer cursos con algúns dos mellores músicos de Galicia, Anxo Lorenzo, Anxo Lois Pintos (Zanfona) ata que establece amizade cun dos grandes Gaiteiros Galegos, Óscar Ibáñez, con él aprende os segredos dos “whistle” e perfecciona a técnica de gaita colaborando tamén en diversos concertos e presentacións de Óscar Ibáñez.
Como músico, Xulio Lorenzo fundou o grupo Xabenga Folk e tamén participou en grupos locais de gran recoñecemento na tradición musical galega, Arume de Guizán, Donicelas, Os Chavellos, Banda de gaitas Charamuscas, así como acompañando a numerosos artistas.
Como compositor, é autor de varias obras tanto para gaita como para frauta doce ou whistle, destacando a “Muiñeira de Mos” e a “Alborada Camiño da Rosa” adicadas o seu Pobo, esta última, presentada coa colaboración dos grupos de gaitas de Mos. Máis de 80 músicos interpretaron a “Alborada Camiño da Rosa” no día da súa presentación.
Co grupo folk Xabenga actúa sobre todo polo sur de Galicia e organiza concertos solidarios para recollida de alimentos, roupa, xoguetes e incluso tapóns para a axuda das persoas máis necesitadas.
No ano 2015 comeza unha aventura musical no Brasil, unha xira de tres meses da man do grupo Gaiteiros de Lume e do seu director Luis Fitzpatrick, onde forma parte da agrupación que ten un gran éxito en Curitiba(rexión Sur de Brasil). Con Gaiteiros de Lume participa en concertos por todo o estado así como na gravación do segundo álbum dos músicos curitibanos.
No Brasil tamén colabora en diversas actuacións coa casa de España no Paraná e especialmente coa agrupación folclórica Aíres Galegos.
Xa de volta en Galicia, Xulio Lorenzo é convidado a viaxar de novo, esta vez a Italia onde fai unha xira polo sur da man do grupo Napolitano Brigan.
A finais do 2015 decide dar forma as súas composicións reunindo con él un equipo formado por grandes músicos do panorama musical actual. Paco Dicenta(Baixo eléctrico), Ioana Pérez (Violín), Diego Bea(Guitarra), Roberto Comesaña(Acordeón), David Outumuro(Percusións), Alberto Vilas (Piano).
Para o seu primeiro traballo discográfico Xulio conta con grandísimos artistas convidados, todos eles de talla internacional, Bieito Romero (Luar na Lubre), Marcos Campos ( Crema de Gaita, Riobó), Pedro Fariñas (Trim, Transilvanians…), Noelia Alvarez Rodriguez-Osorio ( Two in the Mirror, Aretha Franklin Tribute Band…), Marisé Balado (Arume, Orquesta folk Sondeseu…), Francesco Di Cristofaro (Brigan Italia), Alberto Vilas ( Tangata, Alberto Vilas Quartet…) e a Banda de gaitas Xarabal.
