| Domingo 2 de marzo. 2025
| Ás 19:00 h
| Rúa Domingo Bueno » ver mapa
A orquestra foi fundada no ano 1957 por Joaquín García Piñeiro (O Acordeonista), o mítico cantante Constantino Pego e outros 10 compoñentes máis. Foron anos aqueles dedicados a amenizar os bailes e festexos de toda a xeografía galega; pois se é ben certo que se comezou na zona da Coruña, o traballo desta orquestra pronto se foi estendendo ás demais provincias, tanto de Galicia como fóra dela.
Ao longo dos anos pasaron pola orquestra algúns dos mellores profesionais da nosa comunidade, músicos como os irmáns Miguel Ángel e Quin García, (fillos do fundador), José Somoza, Os irmáns Arturo e Emilio Solar, Moncho Ces, Manuel Bandin, Miro Lamas, Juan Léis, Leandro Cruz, Fernando Resúa, David Barciela, Óscar Rodil, Manuel Brey, Carlos Bastón… entre outros, formaron nalgún momento parte da orquestra, xunto con cantantes como José Antonio Blas, Pepi Rama, Pedro Conde, Quico Bea, Vanesa Fernández, David Balboa, Yesica Santín, Ruth Núñez, Cristian Maya, Cibrán Insua… e outros moitos.
Despois de tantos anos, siguen sendo unha das orquestras punteiras en Galicia e o motivo é que sempre souberon adaptarse aos tempos, é por iso que coidan moito o seu repertorio, baseado na actualidade, o vestiario, seguindo sempre as tendencias, a escenografía con coreografías vistosas e moi traballadas. Contan para iso cunha formación de 16 artistas no escenario traballando a diario con moitísimas ganas e cargados dunha enorme ilusión.
Dispoñen dun potente e moderno equipo de son e un gran escenario móbil, co último, tanto en iluminación como en pantallas de led. Un equipo técnico composto por 12 persoas encárganse de montalo e facer que todo soe e luza dunha maneira realmente impresionante.
