| Días 9, 14, 15, 16 e 17 de marzo. 2023
| Actividade concertada cos centros de ensino do Porriño
Concellería de Educación e OMIX do Porriño
A OMIX e a Concellería de Educación do Concello do Porriño levarán a cabo o 9, 14, 15, 16 e 17 de marzo, o programa “Deseño vocacional na era dixital: coñece as novas profesións e crea o teu perfil de futuro” polos centros de Educación Secundaria Obrigatoria do Porriño (IES Pino Manso, IES Ribeira do Louro, CPR Santo Tomás e CPR Hermanos Quiroga).
A xente nova enfróntase á toma de decisións sobre o seu futuro con grandes lagoas de coñecemento e habilidades para o mundo actual. A dixitalización, a automatización e a intelixencia artificial son só algúns dos factores que levan anos transformando todos os sectores produtivos e cambiando os perfís profesionais que buscan as empresas.
Desafortunadamente, moitos itinerarios formativos tradicionais non garanten un emprego ao finalizar os estudos e, moitas veces, cando comezamos a traballar tampouco nos sentimos satisfeitos/as nin motivados/as.
¿Como podemos axudar ás novas xeracións a prepararse para este escenario, descubrir onde poden achegar valor, adquirir os coñecementos e habilidades relevantes para eles/elas e acadar os seus obxectivos?
Neste obradoiro teórico-práctico analizaranse as novas oportunidades que presenta a tecnoloxía; os alumnos e alumnas coñecerán novas profesións axeitadas para as súas fortalezas; descubrirán como seguir aprendendo de balde e empregarán a metodoloxía do Deseño de Vida (Life Design) desenvolvida na Design School de Stanford para deseñar o seu perfil profesional ideal.
Índice de contidos:
- Autocoñecemento: partindo do que temos máis preto
- Habilidades transferibles: que habilidades buscan as empresas
- Novos perfís híbridos: combinar as túas habilidades e coñecementos faite único/a
- O papel do deseño no noso futuro: prototipando o noso perfil ideal
- Novas profesións relacionadas coa tecnoloxía: intelixencia artificial, automatización e robótica, drons etc.
Estes obradoiros (teórico-prácticos de 2 horas) serán impartidos para un total de 165 alumnos/as de 4º da ESO.
