| Sábados e domingos de decembro. 2021
| Parroquias do Porriño
Rondalla Santa Eulalia de Atios e Rondalla de Pontellas
Pasarrúas da Rondalla Santa Eulalia de Atios e Rondalla de Pontellas polas parroquias do Porriño.
ASOCIACIÓN CULTURAL MUSICAL RONDALLA DE PONTELLAS
- 18 de decembro, ás 16:30 h > AA.VV. San Salvador de Torneiros
- 18 de decembro, ás 18:00 h > Porriño casco urbán
- 18 de decembro, ás 19:30 h > Asociación Cultural Os Penediños de Atios
- 19 de decembro, ás 16:30 h > Asociación Cultural de Chenlo
- 19 de decembro, ás 18:30 h > Asociación Cultural San Xurxo de Mosende
- 19 de decembro, ás 19:30 h > Asociación Cultural de Pontellas
Presidente: Marcos Rodríguez Novás
Director: Serafín Rodríguez Rodríguez
Capitán: Urbano González Lorenzo
Director de abandeirados: Cristian González Estévez
Compoñentes da rondalla: 70
A Rondalla de Pontellas volveu iniciar a súa andaina no ano 2003, pois os seus impulsores comezaron coa ilusión de recuperar a rondalla que existira de sempre na parroquia de Pontellas. Dende ese ano, foise consolidando pouco a pouco e merecendo o seu recoñecemento, con un palmarés de premios importante; grazas ao esforzo e traballo de todas e todos os seus integrantes, meramente afeccionados á música, que poñen todo seu empeño en simplemente levar un pouco de ledicia ao público xeral.
Comezaron sendo un grupo pequeno e convertéronse nunha agrupación considerable, crecendo en número de integrantes, homes, mulleres, cativos e cativas desde os 5 anos e sen límite de idade para as persoas adultas.
Na agrupación, os seus compoñentes tocan instrumentos de percusión como as pandeiretas, as castañolas, os cristos ou as charrascas, acompañados por un grupo de instrumentistas de metais e gaitas, e un grupo de abandeiradas e abandeirados.
O seu repertorio componse dunha variedade de estilos musicais, intentando sempre manter a tradición musical da rondalla e tamén mesturando pezas de música actual adaptadas, como por exemplo: adaptacións de música pop, rock, heavy (como Nino Bravo, Michael Jackson ou Bon Jovi).
Convertéronse, deste modo, na rondalla pioneira neste tipo de adaptacións musicais, facendo que se achegue a ela o público máis novo, que é o futuro para manter viva esta tradición rondalleira. Co fin de darlle maior difusión á rondalla, editaron un disco no ano 2017, baixo o nome de “15 Notas”.
Co seu bo facer nesta andaina, teñen a satisfacción de cumprir o obxectivo que perseguían: tentar que sempre estea viva a Rondalla de Pontellas.
RONDALLA DA ASOCIACIÓN RECREATIVA SANTA EULALIA DE ATIOS
- 18 de decembro, ás 16:00 h > Asociación Veciñal e Cultural As Mimosas de Carracido
- 18 de decembro, ás 17:30 h > AA.VV. O Castelo de Cans
- 18 de decembro, ás 19:00 h > AAsociación Cultural Os Penediños de Atios
- 19 de decembro, ás 10:00 h > Asociación Cultural de Mosteiro de Budiño
- 19 de decembro, ás 11:00 h > Asociación Cultural A Forna de Budiño
- 19 de decembro, ás 12:00 h > Asociación Cultural Casal de Budiño
- 19 de decembro, ás 19:15 h > Asociación Cultural de Pontellas
Presidente: Damián Domínguez Mouriño
Director: Alexandre Fernández Castro
Capitán: José Manuel Domínguez Pérez
Capitá de abandeirados: Andrea Fernández Ramilo
Compoñentes da rondalla: 106
Na actualidade, sen ningún tipo de dúbida, na parroquia de Atios do concello do Porriño hai moita afección polas rondallas. Proba disto son as orixes ás que se remonta a Rondalla de Atios, alá polo ano 1925. Incluso, nos anos 50 chegou a haber dúas rondallas, denominadas Atios de arriba e Atios de abaixo.
Ao longo de todos estes anos, a Rondalla pasou por diversas etapas, algunhas delas nas que incluso houbo anos de silencio sen ningún tipo de actividade. Pero a grande afección que existe entre a veciñanza desta parroquia por ela fixo posible a súa continuación ata a actualidade.
Dentro do seu repertorio tivo, e ten, música moi variada: dende pezas de música tradicional ata outras máis modernas de grupos de moda, achegando, así, variedade de gustos para todos os públicos.
Está constituída por abandeiradas/os, pandeireteiras/os, charrasqueiras/os, castañolas, cristos e unha variedade de músicos (trompetas, trombóns, saxos, gaitas, percusión…).
