| Durante os meses de marzo, abril e maio. 2023
| Actividade concertada cos centros de ensino do Porriño
Organizan: Concellería de Educación e OMIX do Porriño
Financiado por: Consellería de Sanidade da Xunta de Galicia
Obradoiro de creación de curtametraxes sobre prevención do consumo de tabaco, alcol e drogas entre adolescentes.
A Concellería de Sanidade e a OMIX do Concello do Porriño, levarán a cabo neste curso escolar, dende marzo ata maio de 2023 o programa “Corto e Cambio” polos centros educativos de secundaria do Porriño, dirixido a un total de 165 alumnos/as de 4º da ESO, en horario lectivo e con 6 sesións de traballo con cada aula.
Este programa fundaméntase, principalmente, na Teoría da Aprendizaxe Social, que explica que as persoas se inician no consumo de drogas a través dos procesos de modelado e reforzamento que son mediatizados por factores persoais.
Incorpora, así mesmo, elementos do modelo de educación para a saúde, a través da adquisición activa de información baseada na evidencia, a promoción e adestramento das habilidades persoais necesarias para adoptar medidas destinadas a mellorar a propia saúde.
Tamén se ten en conta o modelo evolutivo, que indica que habitualmente o consumo de drogas legais precede ás ilegais; isto non implica que a progresión sexa inevitable senón que a probabilidade ou o risco de consumir drogas ilegais aumenta co consumo de tabaco e alcol, polo tanto o obxectivo dos esforzos preventivos dirixidos á comunidade adolescente debe ser reducir ou previr o consumo destas substancias.
O principal é tratar de involucrar o alumnado nunha tarefa creativa común, na que, a través de recursos audiovisuais, os mozos e mozas participantes traballen a temática e reflexionen sobre as problemáticas e consecuencias:
- Coñecer as consecuencias físicas, psíquicas e sociais derivadas do consumo das distintas drogas.
- Desenvolver capacidades e habilidades que lles posibiliten tomar decisións responsables e coherentes co valor da saúde.
- Adquirir coñecementos e habilidades dirixidas a minimizar os riscos asociados ao consumo de drogas.
- Desenvolver unha actitude positiva e de respecto cara ás persoas non consumidoras.
- Corrixir ideas e crenzas erróneas respecto ao consumo de drogas.
Traballarase todo o que rodea a elaboración dun documental sobre esta problemática, dende unha metodoloxía de aprendizaxe significativa, cunha forte presenza das novas tecnoloxías, baseándonos na utilización de curtametraxes e recursos audiovisuais realizados por alumnas e alumnos de idades similares ás súas, de xeito que sexa máis doado empatizar e implicalos/as á hora de traballar contidos que integran os elementos básicos para entender a problemática e as súas consecuencias.
Curtas Corto e Cambio
Presentación das pezas audiovisuais
O festival de Cans acolle este ano a presentación das pezas audiovisuais elaboradas polo alumnado de 4º da ESO dos distintos centros do Porriño, no marco do programa “Corto e Cambio”.
En total proxectaranse 9 pezas audiovisuais, entre curtas de ficción e anuncios de sensibilización pensados, dirixidos, protagonizados e gravados por alumnos e alumnas de 4º do IES Pino Manso, IES Ribeira do Louro, CPR Santo Tomás e CPR Hermanos Quiroga, cos seus propios teléfonos móbiles.
Esta parte teórica, na que o alumnado contou co apio de dúas traballadoras sociais, viuse completada por outra máis práctica, centrada na creación audiovisual, na que estiveron acompañados por un titulado en comunicación audiovisual, e na que as alumnas e alumnos plasmaron as súas ideas e coñecementos adquiridos en guións; converteron eses guións en planos, rodáronos (tanto diante como detrás da cámara, dirixindo e actuando) e mesturáronos na montaxe.
O resultado do seu traballo poderá verse o próximo venres 19 de maio no Festival de Cans. Será ás 18:00 h no Baixo de Carlos (ao carón do Parque do Río), e tamén estará dispoñible na páxina web municipal e nas redes sociais a partir desta data.
Dito programa está financiado pola Consellería de Sanidade da Xunta de Galicia
