| Venres 12, ás 20:00 h
| Sábado 13, ás 18:00 h
| Centro Cultural Municipal » ver mapa
| Entrada libre e de balde ata completar prazas
Adicado á cineasta e fotógrafa franco-armenia Valérie Massadian
A XX edición do Festival de Cans contará coa presenza da cineasta e fotógrafa franco-armenia Valérie Massadian. O certame dedicaralle o Foco Internacional, cunha retrospectiva completa na que presentará as dúas longametraxes e sete curtametraxes, seis delas inéditas en España. Tamén participará na matinal do venres 19 de maio nun coloquio con outras realizadoras e realizadores galegos, dentro da sección “Café con Crea”.
Massadian, premiada nalgún dos festivais máis prestixiosos do mundo coma o Festival de Locarno, é autora dunha obra íntima e persoal, habitada por personaxes femininas dotadas dunha fortaleza única. Sobreviventes e loitadoras, as nenas ou mulleres que protagonizan as súas películas teñen en común unha fraxilidade rebelde, movida pola necesidade do agarimo e do afecto, e polo coidado dos demais ou dunha mesma. Un cinema cheo de xestos e voces que se negan a conformarse, onde o poético e o político van da man, xa sexa a través do silencio ou da palabra.
A cineasta franco-armenia é unha autora radicalmente independente, partidaria de traballar con equipos reducidos e de borrar as fronteiras entre a realidade e a ficción, cultivando a confianza das persoas que se converterán nas súas personaxes. Se a fotografía permitiulle desenvolver unha coidada estética visual, cun gran dominio da luz, a cor e o encadre, o cinema permítelle organizar o espazo para que as cousas sucedan ante a cámara case en tempo real.
A presenza de Valérie Massadian en Cans correspóndese coa liña emprendida nos últimos años polo festival de convidar a cineastas de prestixio internacional, cunha filmografía aínda en crecemento, e que tiveran experiencia previa no mundo da curtametraxe. Massadian súmase a outros realizadores que pasaron por Cans como o portugués Joao Nicolau, o brasileiro Kleber Mendonça Filho ou o alemán Hannes Stöhr. Un dos obxectivos da sección Foco Internacional é favorecer experiencias de intercambio e enriquecemento entre cineastas de Galicia e cineastas doutras partes do mundo, a nivel creación e mesmo produción.
A retrospectiva inclúe as dúas longametraxes que rodou ata o momento –Nana (2011), Mellor Película no Festival de Cinema de Locarno; e Milla (2017), Premio Especial do Xurado e Premio do Público no mesmo festival, entre outros. Tamén poderán verse sete curtametraxes e instalacións (seis inéditos en España): América (2013), Ninouche (2011), Solitudes. L’insomnie (2019), La tempête(2018), Care (2022), Mamoushka (2014) e Ire (2021).
Na semana previa do festival, no Centro Cultural do Porriño, poderán verse Nana, o venres 12 de maio e Milla, o sábado 13, con entrada gratuita. No seu sorprendente debut (Nana), a cámara de Massadian observa fascinada como unha nena, sen o coidado dos seus maiores, desenvolve un instinto de supervivencia inaudito. Na súa seguinte película, Milla, unha parella nova sumida nunha precaria e monótona existencia, converte unha casa abandonada nun refuxio para soñar e resgardarse da fría humidade de Normandía.
Nas súas curtametraxes resoa de novo esa resiliencia que caracteriza ás súas heroínas, pero as mulleres fálannos agora de maneira máis clara e directa. Tamén vemos nestes traballos, o gusto polo xesto, a observación metódica, a fascinación polo detalle.
Nana
Proxección: venres 12 de maio, ás 20:00 h no Centro Cultural Municipal
Título orixinal: Nana
Ano: 2011
Duración: 68 min.
País: Francia
Dirección: Valérie Massadian
Guion: Valérie Massadian
Fotografía: Léo Hinstin e Valérie Massadian
Interpretación: Marie Delmas, Kelyna Lecomte, Alain Sabras
Produtora: Gajin, Epicentre Films
Xénero: drama
Sinopse:
Nana (Kelyna Lecomte) é unha nena de catro anos que vive coa súa nai nunha casa no bosque. Unha tarde, cando volve do colexio, descobre a soidade: a súa nai non está e todo é silencio. A partir de entón non terá máis remedio que arranxarllas por si mesma, utilizando a súa precoz liberdade para apropiarse do mundo.
Milla
Proxección: sábado 13 de maio, ás 18:00 h no Centro Cultural Municipal
Título orixinal: Milla
Ano: 2017
Duración: 128 min.
País: Francia
Dirección: Valérie Massadian
Guion: Valérie Massadian
Fotografía: Mel Massadian, Robin Fresson
Interpretación: Severine Jonckeere, Luc Chessel, Ethan Jonckeere
Produtora: Coproducción Francia-Portugal; Cinémadefacto
Xénero: drama
Sinopse:
Milla só ten 17 anos e o seu mozo, Leo é un pouco maior que ela. A existencia da parella está pautada por pequenos traballos mal pagos e noites nas que desexan cambiar o mundo. A parella achará refuxio nunha pequena cidade, nunha casa abandonada a beiras da Mancha que se converte no seu acubillo provisional. Nútrense do amor, da testarudez da mocidade e das ganas de cambiar as cousas, a pesar das dificultades e das estreitezas dunha vida nada fácil.
Páxina web do Festival de Cans [ ligazón externa ]
