ACTUALIZACIÓN: cambio de data por previsión meteorolóxica adversa
| Venres 26 de abril Venres 10 de maio. 2024
| A partir das 10:30 h
| Parque Alba de Torneiros » ver mapa
| Actividade concertada cos centros educativos do Porriño
Organizan: coordinadores/as das bibliotecas dos centros educativos
Colaboran: Concellería de Educación, Servizo de Normalización lingüística e OMIX do Porriño
Desde a Concellería de Educación e Normalización Lingüística e a OMIX do Concello do Porriño continuamos apostando por proxectos innovadores para difundir a lingua e cultura galegas entre a nosa comunidade educativa.
Tras o éxito do ano pasado, a celebración desta III Xuntanza Literaria dará lugar a unha xornada de convivencia e fomento e animación á lectura, favorecendo a inclusión coa participación dos centros educativos do Porriño, ACEESCA, o Centro de Día de Torneiros e a Asociación AFAGA. Intentaremos facelo dun xeito lúdico e utilizando a contorna natural que nos ofrece a parroquia de Torneiros.
O programa para este día está organizado polos/as coordinadores/as das bibliotecas dos centros escolares, coas que o Concello do Porriño colabora.
Os centros participantes nesta III Xuntanza Literaria son o CPR Santo Tomás, IES Pino Manso, Aceesca, CEIPP Fernández López, CPR Hermanos Quiroga, CEIPP Antonio Palacios, IES Ribeira do Louro, CEIP da Cruz-Budiño, CEIPP de Atios, o Centro de Día de Torneiros, a Asociación Afaga e o CEIPP da Ribeira.
Abordaranse os seguintes contidos:
- Fomentar o gusto pola lectura en lingua galega, a través da lectura individual e colectiva de varios fragmentos de obras galegas por parte dos grupos participantes.
- Estas expresións literarias, vense reforzadas, tamén, coa música (outra forma de expresión literaria) que serve para expresar determinados sentimentos e emocións dunha forma máis lúdica e divertida. Da man, outro ano máis, de Xoán Curiel, con dous artistas máis en escena, ofrecerase un concerto interactivo de 50 minutos ao estilo dunha representación teatral; no que pequenos, mozos e maiores, non serán simples espectadores/as senón que participarán desta actividade lúdica e cultural mediante coros e xogos e sempre empregando a lingua galega como ferramenta de traballo.
Desde o Concello e os departamentos de biblioteca dos centros participantes, perseguimos alcanzar coa realización da edición deste ano, entre outros os seguintes obxectivos:
- Promover o uso da lingua galega entre a infancia, a mocidade e a terceira idade.
- Promover a lectura en lingua galega entre a infancia, a mocidade e a terceira idade.
- Motivar a participación activa da mocidade en proxectos creativos que fagan uso da lingua galega.
- Favorecer a inclusión das persoas con diversidade intelectual e funcional.
- Favorecer a inclusión de persoas da terceira idade en actividades nas que participe a infancia e a mocidade.
- Promover a transmisión cultural interxeracional.
- Dignificar a lingua galega e achegala á comunidade e a grupos da terceira idade a través da literatura e da música.
- Promover a socialización en lingua galega dos distintos grupos de persoas participantes.
- Promover e darlle visibilidade ás actividades a prol da lingua galega, mediante a súa publicación nas redes sociais, páxinas web institucionais e noutros medios de comunicación e difusión.
Programa
- Ás 10:30 h: chegada ao parque Alba
- De 10:30 a 11:30 h: lectura intercentros
- De 11:30 a 12:00 h: merenda
- De 12:30 a 13:00 h: actuación e clausura